ഹ..ഹ..ഹ..

പെരുന്നാള് വിളി

2011-04-11T03:02:00.000-07:00

പെരുന്നാളായിററ് ഞമ്മള്യൊന്നും വിളിക്ക്ന്നില്ലേ കദീശ്ത്താ.....

ഇടവഴിയിലൂടെ പോകുന്ന ഗണേശന്‍ മതിലിനുമേലത്തെ പറമ്പില്‍

ആടു മേക്കുന്ന കദീശത്തായോട് ലോഗ്യം പറഞ്ഞു.
അയ്യടാ കയിഞ്ഞ സ്വയന്ത്യ്ര ദെനത്തിന് ഞി ഞമ്മള ക്ഷണിച്ചീല്ലാലോ...

അന്ന ഞമ്മളും ബിളിക്കുല^

കദീശത്താന്റെ മറുപടി വന്നു.

2010-12-11T13:23:00.000-08:00

പുട്ടും പീലിയും

'വെള്ളേട്ടാ പുട്ടിന്റുള്ളില്‍'ഒരു മുടിനാര്'

കപ്പക്കറിയും കൂട്ടി പുട്ട് അകത്ത് കമഴ്ത്തുന്നതിനിടെ ദിനേശന്‍ കണ്ടെത്തല്‍ വിളംബരം ചെയ്തു.
സമാവറിലെ കനലൂതുന്നതിനിടെ തിരിഞ്ഞു നിന്ന് വെള്ളേട്ടന്റെ മറുപടി വന്നു

നാലുറുപ്പ്യക്ക് തര്ന്ന പുട്ടില് മു ട്യല്ലാണ്ട് മയില്‍പ്പീലി വെച്ച്വരാന്‍ പറ്റ്വോ ചങ്ങായീ....

2010-09-02T13:00:00.000-07:00

മുകുന്ദന്റെ ഡല്‍ഹി സമദിനെ വിളിച്ചപ്പോള്‍

മയ്യഴിയുടെ കഥാകാരന്‍ എം.മുകുന്ദനാണ്
പൂളക്കല്‍ കണ്ടി സമദിനെ
നാടു വിടാന്‍ പ്രേരിപ്പിച്ചത്. 'ഡല്‍ഹി' ഉറക്കമിളച്ച് വായിച്ചതിന്റെ നാലാം പക്കമാണ് ഉമ്മാന്റെ മൂന്നരപവന്‍ മാലയും അയ്യായിരത്തി പതിമൂന്നുറുപ്പികയും സമാഹരിച്ച് ഓന്‍ ഡല്‍ഹി കാണാനായി ഒളിച്ചുപാഞ്ഞത്.
മുതുവക്കര ഉല്‍സവത്തിന് ചട്ടി കളിയില്‍ പങ്കുകൊണ്ട് കൈവരിച്ചതിന്റെ ശേഷിപ്പ് പതിമൂന്നുറുപ്പ്യേം അസ്തിത്വ സങ്കടോം മാത്രായിനും ത്രേ അന്നത്തെ സ്വന്തമെന്നു പറയാനുള്ള യാത്രാ ബത്ത. ബാക്കി പുന്നാര ഉമ്മാനെ കണ്ണുവെട്ടിച്ചതും.
ഇറക്ക സീനിനു മുമ്പ് ഉമ്മയുമായി ഒരു തര്‍ക്കം കഴിച്ചതിനാല്‍ നേരത്തോടു നേരം കഴിഞ്ഞപ്പോള്‍ ഉമ്മാക്കും ഇക്കാക്കും അനന്തിരവനും ആധിയായി. നാടാകെ ഓനായി നാട്ടുകാര് പരതി. സുധാകരേട്ടന്‍ ട്രിപ്പ് ത്യജിച്ച് ജീപ്പ് എന്‍ക്വയറി സംഘത്തിനായി വിട്ടുകൊടുത്തു.
അപ്പോഴാണ് കോഴിക്കോട് റെയില്‍വേ ബൂത്തില്‍ നിന്ന് ഖല്‍ബിന്റെ ഫോണ്‍മൊഴി.

ഡല്‍ഹിക്ക് ടിക്കറ്റെടുത്തു.
മഹായാനം ഉടന്‍ തുടങ്ങും.

ഉമ്മാ നെഞ്ചത്തടിച്ച് നിലവിളീം തുടങ്ങി.
പിറ്റേന്ന് പൊലരാന്‍ നേരത്ത് ജീപ്പില്‍ ആള് മുറ്റത്ത് വന്നിറങ്ങി.
ഫോണ്‍ വിളിക്ക് ശേഷം ട്വിസ്റ്റ്.
പണവും ടിക്കറ്റും മാലയുമടങ്ങിയ ബാഗ് ഭും ശൂന്യം!
കള്ളനു തെറിവിളിച്ച് അവസാന കോയിനില്‍ തോഴനെ വിളിച്ചു. നാട്ടിലെത്തിക്കണേ....
പിറ്റേന്ന് ചായപ്പീടികച്ചര്‍ച്ചയില്‍ മുകുന്ദന്റെ ഡല്‍ഹിയും സമദിന്റെ ഒളിച്ചോട്ടവും ഹൈലൈറ്റായി.

ഓന്‍ മുകുന്ദന്റെ 'റഷ്യ' വായിക്കാഞ്ഞത് നന്നായി. പിന്ന പിടിച്ചാകിട്ട്വായിനോ?

ലൈബ്രേറിയന്‍ കുഞ്ഞിക്കേളപ്പേട്ടന്‍ ആശ്വസിച്ചു.
പീട്യക്കോലായില്‍ നെടുവീര്‍പ്പിന്റെ സംഘഗാനം.

2010-07-08T07:56:00.000-07:00

പാവം ഉറുഗ്വായ്

കുഞ്ഞിക്കണാരേട്ടന്റെ പീടിക കോലയില്‍ 20 ഇഞ്ച് സ്ക്രീനില്‍ ലോകകപ്പ് പൂത്തു തളിര്‍ത്തു. പരാഗ്വേയ് ഗോളിയുടെ അമ്മായിയപ്പന്റെ സ്വഭാവം വരെ പഠന വിധേയമാക്കിയ അതി ഫുട്ബോളന്‍ എക്സ് മില്‍ട്രി രാഘവേട്ടന്‍ മുതല്‍ പന്ത് പോസ്റ്റ് ഗോളെന്ന ബാലപാഠം മാത്രമറിയുന്ന പാണ്ടന്‍ സുധന്‍ വരെ വീടുപേക്ഷിച്ച് ഉറക്കവുമായി ബന്ധം വേര്‍പെടുത്തി അവിടെ കളി അനുഭവിച്ചു.
ഹോളണ്ട് ബ്രസീല്‍ പ്രീ കോര്‍ട്ടര്‍
ബ്രസീല്‍ ഒട്ടും നുരയുന്നുമില്ല പതയുന്നുമില്ല. തണുപ്പന്‍ നീക്കങ്ങള്‍

പറഞ്ഞിറ്റ് കാര്യല്ല ഓരെ നല്ല കളിക്കാരന്‍ ഉറുഗ്വായ് ന്ന് ടീമിലില്ലാഞ്ഞിട്ടാ- സുധന്റെ കമന്ററി വലിയൊരു ചിരിയുടെ അകമ്പടിയോടെ വീണു പൊട്ടി.

പത്രത്തില്ണ്ട് ഉറുഗ്വായെ പരിക്ക് അലട്ട്ന്നെന്ന്-സുധന്‍ ബഹളം മറികടന്ന് സമര്‍ഥിച്ചു.

2010-06-22T06:30:00.000-07:00

രമേശന്റെ മനോധര്‍മ്മ നാടകം
കലാസമിതി നാടക മല്‍സരങ്ങളുടെ സീസണ്‍. ഉദ്യാനം കലാസമിതിയുടെ റിഹേഴ്സല്‍ ക്യാമ്പ് നാരായണന്‍ മാഷിന്റെ വീടാണ്. കലാസ്േനഹിയായതിനാല്‍ നാടകചെലവിന്റെ വലിയ പങ്കും താരങ്ങള്‍ക്ക് ഭക്ഷണ സുഭിക്ഷതകളും മാഷ് ഏറ്റെടുത്തിരിക്കയാണ്.
ഒറ്റ കണ്ടീഷന്‍ നാടകത്തില്‍ മരുമകന്‍ രമേശനും അവസരം നല്‍കണം.
സെലക്ഷന്‍ സമയത്തു തന്നെ രമേശന്‍ കഴിവു തെളിയിച്ചു. ബാല്യമോര്‍ത്ത് തുമ്പിയെ പിടിക്കാന്‍ പോകുന്ന മാനസികരോഗിയുടെ ചലനം. രമേശന്‍ അന്വര്‍ഥമാക്കിയപ്പോള്‍ സംവിധായകന്‍ ഭാസ്കരന്‍ തമാരൂരിന്റെ കമന്റ്
ഞ്ഞി എന്താടാ പടകത്തിന് തീ കൊട്ക്കാന്‍ പോന്നോ...ഇങ്ങന്യാ തുമ്പീനെ പിടിക്യാ...
രമേശന്‍ കാണിച്ച പ്രകടനത്തിന് പറ്റിയ ഉപമയെന്ന് സഹതാരങ്ങള്‍ക്ക് തോന്നി.രണ്ടാം ദിനം കൊണ്ടു തന്നെ ഒരു കാര്യം ഗ്യാരണ്ടിയായി. രമേശന്‍ അഭിനയമല്ല നാടകം തകര്‍ക്കുമെന്ന്.

സംവിധായകനും സഹതാരങ്ങളും വിമത നീക്കം നടത്തി. നാരായണന്‍ മാഷെ വിഷമിപ്പിക്കരുത്്, നാടകം നന്നാവണം. വഴി തെളിഞ്ഞു.നാടകത്തില്‍ ഒരു പ്യൂണിന്റെ വേഷം സന്നിവേശിപ്പിച്ചു. സംഭാഷണമില്ല, രംഗം ദുര്‍ലബം,ചില സാധനങ്ങള്‍ എത്തിക്കുന്ന പണി മാത്രം. അഭിനയിച്ച ു തകര്‍ക്കാന്‍ ആവേശപ്പെട്ടു വന്ന രമേശന്‍ അങ്ങനെ ഒതുങ്ങി.

ആദ്യ മല്‍സരം കൊല്ലോറപ്പറമ്പില്‍. തരക്കേടില്ലാതെ നാടകം മുന്നോട്ട് പോയി. രമേശന്റെ ഊഴം. മാനേജര്‍ മണി മുഴക്കുമ്പോള്‍ ഫയല്‍ എത്തിക്കണം.രമേശന്‍ രംഗത്ത്. കാണികളെ കണ്ടപ്പോള്‍ അഭിനയഭ്രമം ഉച്ചിയില്‍ കയറി രമേശന്‍ മനോധര്‍മം തുടങ്ങി. പ്യൂണ്‍ ചുമച്ച് കഫം തുപ്പുന്ന ഹമ്മേ ഹയ്യോ പറയുന്ന ക്ഷയരോഗിയായി നിറഞ്ഞാടി.രണ്ട് സെക്കന്റില്‍ തീരേണ്ട രംഗം അധിക സംഭാഷണവും ചേര്‍ത്ത് അഞ്ചുമിനിറ്റോളം നീണ്ടു.
വേദിക്കു പിറകില്‍ സംവിധായകന്‍ കത്തിജ്വലിച്ചു. നാടകം കഴിഞ്ഞു. രമേശന്റെ പ്രഛനനവേഷമാഴിച്ച് ബാക്കി നന്നായെന്ന് ആസ്വാദകര്‍ വിധിച്ചു.
'നീയെന്തിനാ ചുമച്ചു തുപ്പി ആര്‍ഭാടമാക്കിയത്.ആരു പറഞ്ഞു നിന്നോടങ്ങനെ ചെയ്യാന്‍'
സംവിധായകന്‍ രമേശനോട് ഉറഞ്ഞു തുള്ളി.
അത് നമ്മടെ പ്യൂണിന് ഭയങ്കര ക്ഷയരോഗമുള്ളതോണ്ടാ.സംഭവം തകര്‍ത്തില്ലേ
രമേശന്റെ മറുപടിയില്‍ സംവിധായകന്‍ തറപറ്റി.
രണ്ടാം വേദി കൈതപ്പറമ്പ് സ്കൂളില്‍. റിഹേഴ്സലിന് നേരത്തെ തന്നെ മനോധര്‍മരമേശന്‍ സന്നിഹിതനായി.എത്ര കാത്തിട്ടും തന്റെ നമ്പര്‍ വരുന്നില്ലെന്ന് കണ്ട് രമേശന്‍ അന്വേഷിച്ചു.എന്റെ പ്യൂണ്‍..
'അറിഞ്ഞില്ലേ ക്ഷയം മൂര്‍ച്ചിച്ച് മൂപ്പര് മെഡിക്കല്‍ കോളേജില്‍ വച്ച് മരിച്ചു പോയി. പാവം'.സംവിധായകന്‍ ടൈമിംഗ് തെറ്റാതെ ആഞ്ഞടിച്ചു.

2010-06-21T06:44:00.000-07:00

ശാന്തേടത്തിയുടെ മില്ലേനിയം
രണ്ടായിരാമാണ്ട് പിറക്കുന്നതിന് തൊട്ടുമുന്‍പുള്ള ദിവസങ്ങള്‍. കമ്പ്യൂട്ടറിനെ തകര്‍ക്കാന്‍ സാധ്യതയുള്ള വൈ റ്റു കെ പ്രോബ്ലവും ലോകാവസാനമെന്ന ആശങ്കയുമെല്ലാം നാട്ടു ചര്‍ച്ചകളില്‍ ഇടം നേടി. മില്ലേനിയം വരവില്‍ പത്രങ്ങളിലും ആഘോഷം. ആകെ എന്തൊക്കെയോ സംഭവിക്കാന്‍ പോവുന്നുണ്ടെന്ന പതിവു തോന്നല്‍ ജനത്തിനെ ഹരം കൊള്ളിക്കുന്ന സമയം.
ഞാട്ടിപ്പറമ്പത്ത് ശാന്തേടത്തീടെ അടുക്കളപ്പുറത്തു ചേര്‍ന്ന ഉച്ച വനിതാ സമ്മേളനത്തില്‍ ഉയര്‍ന്നു കേട്ട ആശങ്ക.
'ഇനി നമ്മളെങ്ങന്യാ കൊല്ലം ചോയ്ച്ചാ പറയാ.ആയിരത്തിത്തൊള്ളായിരത്തി രണ്ടായിരം ന്നൊക്കെ പറഞ്ഞു വരാനെത്ര പാടാ ല്ലേ'
അതും പറഞ്ഞ് രമണ്യേടത്തി വലിയ ചര്‍ച്ചക്ക് തുടക്കമിട്ടു.

2010-06-18T05:55:00.001-07:00

ഹൈ ടെക് കുട്ടിക്കളി
അഞ്ചുവയസുകാരന്‍ മകന്‍ സപ്രൂട്ടന്‍ കട്ടിലില്‍ കിടന്ന് എന്തൊക്കെയോ പരാക്രമങ്ങള്‍ കാട്ടുന്ന കാര്യം ഭാര്യയാണ് രാജീവന്റെ ശ്രദ്ധയിലേക്ക് ക്ഷണിച്ചത്. ചെന്നു നോക്കുമ്പോള്‍ പറഞ്ഞതില്‍ കഴമ്പുണ്ടെന്ന് മനസിലായി. സപ്രു പ്രത്യേകരീതിയില്‍ കമിഴ്ന്ന് നിന്ന് കൈകള്‍ മുകളിലോട്ടും താഴോട്ടും ചലിപ്പിക്കുന്നു. ഭീകര ശബ്ദശല്യവും സൃഷ്ടിക്കുന്നുണ്ട്.
എന്തേടാ നിനക്ക് എന്തേന്ന്?
രാജീവന്റെ ഹൈവോള്‍ട്ടേജ് നാദത്തില്‍ സപ്രു നോര്‍മലായി. വോക്ക് ഔട്ട് നടത്തി.
പിന്നെയും ഭാര്യ വിവരമറിയിച്ചു. ചെക്കന്‍ പതിവു കലാപരിപാടി തുടരുന്നു. രാജീവന്‍ ചെന്നപ്പോള്‍ പഴയ പൊസിഷനില്‍ തന്നെ കളി തുടരുന്നു.
വീണ്ടും അലര്‍ച്ച. വോക്ക് ഔട്ട്.
മൂന്നാം തവണ രാജീവന്‍ ചെന്നത് വടിയുമായി.സംഘര്‍ഷാവസ്ഥ.
എന്താടാ നീ കാട്ട്ന്നേ? രാജീവന്‍ അലറി.
സഹികെട്ട് സപ്രു പറഞ്ഞു.
ഒന്ന് ജെ.സി.ബി കളിക്കാനും സമ്മേക്കൂലേ അച്ചാ?

2010-06-17T13:34:00.000-07:00

ദാമു മാഷ് മനുഷ്യനാണോ?
സ്കൂളിലെ പ്രധാനധ്യാപകനായിരുന്ന ദാമു മാസ്റ്ററുടെ വിരമിക്കല്‍ ചടങ്ങ്. ഓരോ സഹപ്രവര്‍ത്തകരായി ദാമുമാസ്റ്ററുടെ ഗുണഗണങ്ങള്‍ എടുത്തുപറഞ്ഞ് ഉച്ചഭാഷിണിക്കു മുന്നില്‍ ഉറഞ്ഞാടുന്നു. നാട്ടുകാര്‍ക്കും വിദ്യാര്‍ഥികള്‍ക്കും ഒരുപോലെ വേണ്ടപ്പെട്ടവനായ മാഷെക്കുറിച്ച് ഇനി സംസാരിക്കുന്നത് ഹിന്ദി അധ്യാപകന്‍ വിക്രമന്‍ മാഷാണ്. മാഷ് സദസിനെ സംബോധനചെയ്ത് ഉച്ചസ്ഥായിയില്‍ തുടങ്ങി.
'ഇതുവരെയുള്ള പരിചയം വെച്ച് പറഞ്ഞാല്‍ വേണു മാഷ് ഒരു മനുഷ്യനാണോ? ഞാന്‍ ചോദിക്കുന്നു വേണു മാഷ് മനുഷ്യനാണോ എന്ന'്.
സദസ് സ്തംഭിച്ചു പോയി.ബഹളം തുടങ്ങി .നാട്ടുകാര്‍ വേദിയില്‍ കയറി.മുന്‍വൈരാഗ്യമുള്ള ആരൊക്കെയോ പലിശസഹിതം അവസരം മുതലാക്കി. ഇടയില്‍ ഞാന്‍ ബാക്കി പറയട്ടെ എന്ന വിക്രമന്‍ മാഷിന്റെ ദുര്‍ഭലശബ്ദം പറഞ്ഞുകൊണ്ടിരുന്നു.ഒടുവില്‍ ദാമുമാഷ് ഇടപെട്ട് രംഗം ശാന്തമാക്കിയപ്പോള്‍ വിക്രമന്‍ മാഷ് തുടര്‍ന്നു

.'ദാമു മാഷ് മനുഷ്യനല്ല ദൈവമാ ദൈവം'

2010-06-13T13:26:00.000-07:00

ചിമ്പാന്‍സിയും മന്ത്രിയും
വളരെ മുന്‍പുള്ള സംഭവം. വിദേശ പര്യടനത്തിടെ മന്ത്രി ചിമ്പാന്‍സികളുള്ള മൃഗശാല സന്ദര്‍ശിച്ചു. ഒരു പത്രത്തില്‍ ചിമ്പാന്‍സിക്കൊപ്പമുള്ള മന്ത്രിയുടെ പടവും വാര്‍ത്തയും വന്നു.പടത്തിനൊപ്പമുള്ള അടിക്കുറിപ്പ് ഇങ്ങനെ മന്ത്രി ചിമ്പാന്‍സിയെ സന്ദര്‍ശിച്ചപ്പോള്‍ (മന്ത്രി വലത്ത്)!!!!!

2010-06-13T13:16:00.000-07:00

തിയേറ്റര്‍ മുതലാളിയുടെ ഷോ
തൃശൂരുള്ള തിയേറ്റര്‍ ഉടമ അറു പിശുക്കനാണ്. ഷോക്കിടയില്‍ കരണ്ടു പോയാല്‍ ജനറേറ്റര്‍ പ്രവര്‍ത്തിപ്പിക്കുന്ന കാര്യം മൂപ്പര്‍ക്ക് അചിന്ത്യമാണ്. ഇത്തരം സന്ദര്‍ഭങ്ങളില്‍ കൂവിവിളിച്ച് സഹൃദയരുടെ തൊണ്ടക്കൂഴി വരണ്ട് സഹാറയാകുമെന്ന് ചുരുക്കം. എല്ലാം കേട്ട് കരണ്ട് വരുന്നത് വരെ നമ്മുടെ ബോസ് പ്രൊജക്റ്റ് റൂമിലുണ്ടാവും. ഒരിക്കല്‍ മീശമാധവന്‍ കളിക്കുന്നു.ക്ലൈമാക്സിന് അഞ്ച് മിനിറ്റുമുന്‍പ് ദാ കരണ്ട് പണിമുടക്കുന്നു. കാണികള്‍ കലാപരിപാടി തുടങ്ങി.കുറേക്കഴിഞ്ഞപ്പോള്‍ പ്രൊജക്റ്റ് റൂമിനുള്ളില്‍ നിന്ന് തല പുറത്തിട്ട് ബോസ് കാണികളോട് പറഞ്ഞു.'നി എന്തൂട്ട് കാണാനാ ഒവ്വേ...നൊമ്മടെ ഇന്ദ്രജിത്തിനെ പൂശും ദിലീപും കാവ്യെം ഒന്നാവും ചെയ്യും.അത്രേ ള്ളൊ...കൂവണ നേരം കൊണ്ട് ഒന്ന് പോടാ പ്പാ'

2009-09-11T03:57:00.000-07:00

വെള്ളമടി -മരണം

കോഴിക്കോട് നടാടെ വന്നെത്തിയ ഒരാള്‍ ബസ്സ് സ്റ്റാന്‍ഡില്‍ വെച്ചു വെള്ളിമാടുകുന്ന് -മേരിക്കുന്നു എന്ന ബസ്‌ ബോര്‍ഡ്‌ വായിച്ചത്

വെള്ളമടിക്കുന്നു...... മരിക്കുന്നു... !!!

2009-08-29T06:20:00.000-07:00

കിദിംഗ്
രാമേട്ടന്‍ വലിയ സിനിമ പ്രേമിയാണ്‌ . വര്‍ഷങ്ങള്‍ക്ക് മുന്‍പ്‌ ഒരു ദിവസം കുമരെട്ടന്ടെ കടയില്‍ വന്നു മൂപ്പര്‍ ഒരു സിനിമ വിശേഷം പറഞ്ഞു .മമൂട്ടിയുടെ പുതിയ സിനിമ വന്നു "കിദിംഗ്". കേട്ടവര്‍ ഞെട്ടി അത് എന്തോന്ന് പേരു.
യഥാര്‍ത്തില്‍ അത് ദി കിംഗ്‌ എന്ന സിനിമയായിരുന്നു. 'ദി' എഴുതിയ സ്റ്റയില്‍ കാരണം മൂപ്പര്‍ തെറ്റിധരിച്ചതായിരുന്നു .

2009-08-07T06:34:00.000-07:00

തിരു വീഴ്ച

ഭാസ്കരന്‍ തമാരുരിന്റെ നാടകം ഗാഗുല്‍ത്ത വിളിക്കുന്നു കേരളോത്സവത്തിന് മത്സരിക്കുകയാണ്. തമാരുരു നാടകത്തില്‍ യേശുവാണ്. പക്ഷെ രംഗത്ത് വരുന്നില്ല . പകരം ബാക്ക് കര്‍ട്ടന്‍റെ പിറകില്‍ യേശുവിന്‍റെ നിഴല്‍ രൂപമായി നാടകത്തില്‍ ഉടനീളം നില്‍ക്കുകയാണ്‌ . ഒരു വലിയ യുദ്ധത്തിന് സാക്ഷിയായി നില്‍ക്കുന്നതായാണ് നാടകത്തില്‍ ഉള്ളത് .രംഗത്ത് യുദ്ധം പൊടിപൊടിക്കുന്നു .ചിലര്‍ സ്ടേജില് മരിച്ചു വീഴുന്നു , ചിലര്‍ പോരടിക്കുന്നു. എല്ലാത്തിനും സാക്ഷിയായ്‌ പിന്നില്‍ യേശു നില്ക്കുന്നു. നാടകം തുടരവേ പെട്ടെന്ന് യേശുവിനെ കാണാനില്ല..

കയറിനിന്ന സ്ടൂള്‍ മറിഞ്ഞു മൂപ്പര്‍ താഴേക്ക് വീണതാണ്, കുറെ കഴിഞ്ഞപ്പോള്‍ നിഴല്‍ യേശു മെല്ലെ സ്ടൂളില്‍ കയറിനിന്നു തല ചെരിച്ചു കൈ നീട്ടി പൊസിഷന്‍ ശരിയാക്കുന്ന കാഴ്ചയാണ് തിരശീലക്കു പിന്നില്‍ കാണികള്‍ കണ്ടത്.

സദസ്സില്‍ കൂട്ട ചിരിയായി . രംഗത്ത് മരിച്ചു വീണ പടയാളികള്‍ പോലും യേശുവിന്‍റെ ദയനീയ സ്ഥിതി കണ്ടു ചിരിച്ചു പോയി

2009-08-04T05:40:00.000-07:00

പടവിലെ ചാട്ടം

ഏറെ പ്രായമായപ്പോള്‍ രാമുന്നിയച്ചന്‍ അത്തും പിത്തുമായി. നമ്മള്‍ അള്‍സിമേഴ്സ് എന്ന് വിളിക്കുന്നതിന്റ്റെ ചെറിയ രൂപം.ഒരിക്കല്‍ ഉറക്കത്തില്‍ എഴുന്നേറ്റുവാഴയില വെട്ടാന്‍ പോയി മൂപ്പര് .മകളുടെ കല്യാണത്തിന്റെ ഓര്‍മയില്‍ പറ്റിയതാണ് .കത്തിയുമായി അര്‍ദ്ധരാത്രി വഴിയിലിറങ്ങിയ അദ്ധേഹത്തെ കണ്ടു രാത്രിവണ്ടിക്ക് നാട്ടിലെത്തിയ പട്ടാളക്കാരന്‍ കേശവേട്ടന്‍ പേടിച്ചു പ്രശ്നവുമായി.
അതോടെ മൂപ്പര്‍ക്ക് കാവലിനു നാട്ടിലെ വാല്യെക്കാരന്മാരായ സോമനും ,ഉണ്ണിയും, പ്രമോദും നിയോഗിക്കപ്പെട്ടു .
രാത്രി രാമുണ്ണി അച്ഛന്റ്റെ കട്ടിലിനു താഴെ അവര്‍ കിടപ്പ് തുടങ്ങി. മൂപ്പര് പുറത്തേക്ക്‌ ഇറങ്ങാന്‍ തുടങ്ങിയാല്‍ തടയണം അതാണ്‌ ഡ്യൂട്ടി.
ഒരു രാത്രി ഉറങ്ങിക്കിടന്ന നാല്‍വര്‍ സംഘതിന്റ്റെ മേലേക്ക്‌ ചക്ക വെട്ടിയപോലെ രാമുണ്ണി അച്ഛന്‍ വീണു. പിന്നെ കയ്യും കാലുമിട്ട് പിടക്കാനും തുടങ്ങി . കാര്യമെന്തെന്ന് മനസിലാക്കാതെ ഉറക്കപ്പിച്ചില്‍ കാവല്ക്കരന്മാര്‍ കരച്ചിലുമായി.
സംഭവിച്ചത് ഇതാണ് .അമ്പല കുള പടവാണെന്നു കരുതി കട്ടിലില്‍ ഇരുന്നു വിസ്തരിച്ച് എണ്ണയൊക്കെ പുരട്ടി താഴെ കുളത്തിലേക്ക്‌ നീരാടാന്‍ ചാടിയതാണ് മൂപ്പര് !

കണ്ണ്വന്റെ താടി

2009-08-01T04:33:00.000-07:00

ശാകുന്തളത്തിലെ ഒരേട്‌ നാടകം പുരോഗമിക്കുകയാണ്. നാടകസംവിധയകനായ ഭാസ്കരന്‍ തമരൂര് തന്നെയാണ് കണ്ണ്വമഹര്‍ഷിയുടെ വേഷം ചെയ്യുന്നത്. ഭാസ്കര്‍ജി നീണ്ട താടിയും തടവി രംഗത്തെത്തി . തടവലിനു സ്വല്പം ശക്തി കൂടിപ്പോയതിനാല്‍ വെപ്പ് താടി ഊരി കയ്യില്പ്പോന്നു. "ശകുന്തളേ ഇതു അകത്തേക്ക് വച്ചേക്കൂ " യാതൊരു പരിഭ്രാമാവുമില്ലാതെ മഹര്‍ഷി മനോധര്‍മ ഡയലോഗ് കാച്ചി.

2009-08-01T03:14:00.000-07:00

കെ എസ് ഈ ബി ക്കൊരു പണി

കറന്റ് ചാര്‍ജ് അടക്കാന്‍ സുരേട്ടന്‍ ക്യൂ വില്‍ നില്‍ക്കയാണ്‌ . തന്റെ ഊഴമായപ്പോള്‍ കൌണ്ടെറിലെ വിടവിലൂടെ മൂപര് പണം നീട്ടി .ക്ലെര്‍ക്ക്‌ വാങ്ങാന്‍ തുടങ്ങുമ്പോഴേക്കും പെട്ടെന്ന് പിന്നോട്ട് വലിച്ചു. വീണ്ടും പണം നീട്ടി പെട്ടെന്ന് പിന്നോട്ട് വലിച്ചു .ക്ലെര്ക്കിനു ദേഷ്യം പിടിച്ചു .

നിങ്ങളെന്താണ്‌ ആളെ കളിപ്പിക്ക്യാണോ ? ക്ലെര്‍ച്ക് ചോദിച്ചു

'വീട്ടിലെ കരണ്ടിന്റെം സ്ഥിതി ഇതു തന്ന്യാ ' സുരേട്ടന്‍ മറുപടി കൊടുത്തു .

2009-08-01T02:47:00.000-07:00

ബഷീര്‍ പ്രതിഷ്ഠ
സുരേട്ടന്‍ നല്ല തമാശക്കാരനാണ് . ഒരിക്കല്‍ ഒരു ശബരിമല യാത്രക്ക് നാട്ടിലെ ബാലന്‍ ഗുര്സ്വമി യുടെ സംഘത്തില്‍ കന്നിസ്വാമിയായി സുരേട്ടനും ഉണ്ടായിരുന്നു . പല ക്ഷേത്രങ്ങളും സന്ദര്‍ശിച്ചു സംഘം വൈക്കം ക്ഷേത്രത്തിലെത്തി. ശ്രീകോവിലിനു മുന്നില്‍ പ്രാര്‍ത്ഥിച്ചു നില്‍ക്കുമ്പോള്‍ കൂട്ടത്തിലെ സന്തോഷ്‌ എന്ന ഒരു കഥയുമില്ലാത്ത പയ്യന് ഒരു വലിയ സശയം. അവന്‍ പതുക്കെ സുരേട്ടന്റെ കാതില്‍ മന്ത്രിച്ചു .
ഈ വൈക്കം ക്ഷേത്രത്തില്‍ എന്താ പ്രതിഷ്ഠ ?
യാതൊരു ഭാവഭേദവുമില്ലാതെ ഗൌരവത്തില്‍ സുരേട്ടന്‍ മറുപടി കൊടുത്തു
കേട്ടിട്ടില്ലേ വൈക്കം മുഹമ്മദ്‌ ബഷീര്‍ !